「盛勝剩」女愛作「賤戰墊」

       ＴＢＢ啲節目名總係鍾意咬字，有時覺得幾有趣（當然係低級趣味果隻），有時就覺得佢地真係玩到冇野好玩。印象幾深刻嘅節目名其實都唔少，覺得「畢打自己人」呢個名玩文字玩得最好，畢打=不打，不打自己人，幾好；畢打=Brother，brother當然係自己人，得；故事的背景設定在畢打街，啱主題，又得；雜誌社用「筆」寫人，同時用「筆」打擊同行，得左。所以就算劇情唔令觀眾驚喜，我依然欣賞題名人。不過有啲名雖然改得好，但唔理會改名背後嘅故事或者刻意嘩眾取寵，其實唔值得提倡，好似「現代塵世美」呢個節目名，塵世亦有美的一面，表面睇起黎脫俗，聽落唔錯，不過一諗到唔認妻兒只顧享受榮華富貴嘅駙馬爺「陳世美」，仲要玩現代版，突然成件事變得醜陋左。

     

        話說呢幾晚無線播「盛女愛作戰」，本來聽到呢啲名我都冇乜興趣睇，點講我都唔係剩女（年齡上黎講），不過見網上同面書個個都開聲講到話好好睇咁，我又忍唔住睇左幾集，睇下咩料都好。

 　　　　　　　　　　　　　　　　　　　　　　　　　  (圖片取自網絡)  

　　先唔講內容同參加者，雖然節目名用「盛女」，好明顯個編輯想用「盛女」去包裝「剩女」，但「盛女」好似只啱形容返啲風華正茂、或者對感情熾烈嘅女士，起碼我認為係一個褒義詞。但節目選角由二十幾到三十尾都有，有啲角色你唔會用個「盛」字黎形容，依我睇呢個節目名真係值得酙酌，我可以幫ＴＢＢ試下節目名：第一個名為「盛女愛作賤」，正值黃金時期的女人偏偏嫌三嫌四，要知道高峰過後總係直線向下，睇準黃金機會咬實唔放先至係盛女所為，否則如同作賤自己；第二個名為「剩女愛作墊」，「剩女」只係世俗人強加於遲婚女士身上嘅貶稱（但已經約定俗成，你吹佢唔漲），不過有啲人眼角太高，虛耗年華，由盛轉剩都係無可奈何，剩低嘅只可以墊下底，睇下有冇人肯啃你個籮底橙；第三個名為「勝女愛作戰」，好勝嘅女人硬係唔服輸，衰左唔得就再黎，於是好勝帶黎嘅結果就係不停作戰再作戰，而我只會講句祝你好運。如果再玩文字遊戲，可能就會兒童不宜，到時「性女」、「聖女」都出埋黎就唔好(雖然已經出左)。

　　ＴＢＢ嘅編輯都係正正經經改下節目名角色名，咩屈機係屈原第１８代後人呢種都唔好再出街，唔係個個觀眾都係咁低能覺得食字好好笑。