唐生大兄携妻出席記者會回應僭建事宜，一如既往，不知所云。開首幾分鐘表示歉意、說明原因、祈求原諒，其後十多分鐘應對記者的提問，只不斷重覆曾說過的話，而且答非所問，讓人啼笑皆非。姑勿論做一個特首，即使一個普通的公職人員，每個舉動都須向廣大市民交待，「誠信」二字最為緊要。唐生貴為政務司長，違例建築是知法犯法，藉口「挖深咗、雜物房」是欺騙大眾，以妻子當擋箭牌更是冇膊頭冇腰骨，佢對唔住社會、對唔住家人、更對唔住自己！
呢一次佢唔再係嬉皮笑臉，而係正襟危企嚴正以待，我以為佢有專家教路準備充足，對付傳媒可以水來土掩、見蕉拆蕉，但豬口始終長不出象牙，明眼人都知佢接受嘅係填鴨式教育，成部機械咁答問題，自問沒有口才的我答得會比他好。好心佢就請個談判專家又好、大學教授又好，寫篇講稿，冠冕堂皇讀稿，再植入先進儀器，叫人教路答問題。一係就唔好講野喇，三跪九叩，流番幾滴晶瑩剔透嘅眼淚，我相信效果會更好。中文講唔好都算喇，英文一出口又係唔知想點，「everything are facts」?！唔係有祖蔭，真係唔知佢憑咩做官。
其實，佢起地庫，我覺得冇乜大不了，好多獨立屋都向下發展，特別喺新界區。你話日後驚打仗，用黎做防空洞，算，由你，法律唔容許係一回事，起碼唔係霸左我塊地，唔係話你唔起地庫，香港人就會多ｄ樓住，況且你棟樓塌落黎，都唔知有幾多人食住花生等睇戲。之不過，如果你仆心仆命為香港人做野，返到屋企酒池肉林享受私人影院，叉叉電，儲返ｄ電能動能智能唔好咁低能黎服務大家，你造幾萬尺地庫我都撐你。但你唔係，你叫我，我呢個香港人，點樣原諒你，點樣俾個opportunity你，點樣俾個「餐屎」你重新出發呢! ？
沒有留言:
張貼留言
注意：只有此網誌的成員可以留言。